Дипломатч Др. хатагтай Алиша Кэмпи ОУХ-ны оюутнуудтай уулзалт ярилцлага хийлээ


2019-10-17 14:59:24

АНУ-ын дипломатч асан, монголч эрдэмтэн хатагтай Др.Алиша Кэмпи 2019 оны 10 дугаар сарын 1-нд ХИС-ийн хурлын танхимд ОУХНСС-ийн оюутнуудтай уулзалт хэлэлцүүлэг өрнүүлж, өөрийн бичиж, саяхан Вашингтон хотноо хэвлэлээс гарсан "Mongolia's Foreign Policy: Navigating a Changing World" номын танилцуулгаа хийлээ.

Тэрбээр 1986 онд Японд АНУ-ын ЭСЯ-нд дипломат алба хашиж байхдаа АНУ-Монгол Улсын хооронд дипломат харилцаа тогтоох асуудлаарх яриа хэлэлцээнд оролцож, 1990-1992 онд АНУ-аас Монгол Улсад суугаа ЭСЯ-нд зөвлөхөөр ажиллаж байв. Хатагтай Алиша Кэмпи Харвардын их сургууль дүүргэсэн бөгөөд АНУ-ын Үндэсний архивийн Төрийн департментийн тасагт хадгалагдаж буй 1920-1927 оны хооронд дахь Чуулалт Хаалган хотноо Гадаад Монголыг тусгайлан хариуцаж байсан АНУ-ын Консулын газрын архивын үнэ цэнэтэй 50 гаруй хавтас бүхий багц материалыг шүүрдэн эрдэм шинжилгээний эргэлтэд оруулж, 1988 онд "The Political Relationship between the United States and Outer Mongolia, 1915-1927: The Kalgan Consular Records" сэдвээр Индиана их сургуульд улс төрийн шинжлэх ухааны докторын зэрэг хамгаалжээ. Тэрбээр судалгаагаа гүнзгийрүүлж 1992 онд "Perceptions of the Outer Mongols by the U.S. Government as a Reflected in Kalgan (Inner Mongolia) U.S. Consular Records 1920-1927" томоохон өгүүллээ АНУ-ын Mongolian Studies сэтгүүлийн 1992 оны Vol. XIV-т хэвлүүлсэн юм. 2009 онд "The Impact of China and Russia on U.S.-Mongolian Political Relations in the XX Century" даацтай бүтээл (605 хуудас) нь хэвлэгдэн гарсан юм. Эдүгээ "U.S.-Mongolia Advisory Group"-ын Ерөнхийлөгчөөр ажилладаг.

 

ОУХНСС
2019.10.14